phunk dalegi ye ashkon ki sharar-bari mujhe
rakh mein kab tak daba rakkhegi chingari mujhe

tang mere jism par hai parsai ka libas
mar dalegi kisi din ye riya-kari mujhe

bechta hun apne fan-pare khule bazar mein
kar gai ruswa sar-e-bazar nadari mujhe

mere hisse mein to ghairon ki aza-dari bhi hai
kab gawara hogi apnon ki dil-azari mujhe

apni bedari ka khud mujh ko yaqin aata nahin
lag gai hai aaj-kal khwabon ki bimari mujhe

apne hi dil ki gawahi par kiya tha eatibar
kar gai badnam khud apni taraf-dari mujhe

wo suluk-e-narawa mujh se ba-nam-e-iltifat
doston ki yaad hai ab tak adakari mujhe