phunki gham-e-firaq ne ye tan-badan mein aag
ab jism ki jagah hai mere pairahan mein aag

angaron par litati hai furqat mein sair-e-bagh
ho mera ikhtiyar to de dun chaman mein aag

abr-e-siyah nahin ye dhuan hai bhara hua
kis ne laga di aaj sipahr-e-kuhan mein aag

kushte hain tere rukh ke jo ai aatishin-ezar
le jaenge wo bandh ke apne kafan mein aag

rukhsat hui bahaar khizan ke din aa gae
ai baghban laga de ab apne chaman mein aag

sahra hamari garmi-e-raftar se jala
apne hi soz-e-gham ne laga di chaman mein aag

kis ne kiya tere lab-e-lalin ka tazkira
ahl-e-yaman ne aaj laga di yaman mein aag

zulfon se yun ayan hai tera ru-e-atishin
jaise lagi ho wadi-e-chin-o-khutan mein aag

'akbar' teri zaban hai kya shama ki zaban
har fiqra tera shoala hai har har sukhan mein aag