puchh lete jo muddaa hum se
phir na karte koi gila hum se

tha zamana to bad-guman lekin
aap bhi ho gae khafa hum se

hai khuda-hafiz ab to kashti ka
dur ho dur na-khuda hum se

hum ko to zindagi ne mar liya
kya kahegi bhala qaza hum se

aap ka hum se wasta to ye
wasta aur aap ka hum se

dekh kar un ko aankh bhar aai
us se aage na kuchh hua hum se

tum ne 'bismil' zamana dekh liya
kam mile honge ba-wafa hum se