purane jitne bache the baha diye aansu
nae hain gham hain nae zakhm hain nae aansu

jo dil pe zulm ki had ho nikal pade aansu
palak pe bojh jo badh jae tab gire aansu

phir aa gae hain jo aankhon mein to karenge hi
tamam zakhm mere dil ke phir hare aansu

mere liye wo kam-az-gauhar-e-nashat nahin
mere liye ho to bekar kyon bahe aansu

na tere jaisi dulhan hogi phir ramane mein
jo teri palkon pe aa jae aur saje aansu

musafiron ki thakan ke liye the khana-e-chashm
musafiron ki tarah aae aur gae aansu

nazar jamae hue hai wo teri aankhon par
tu apni aankh ke andar samet le aansu

hansi wo shai ki labon mein dabe to chhup jae
ubal ke aata hai aankhon mein gar dabe aansu

juda ho khar se gul ya ho gul se khar juda
nikal phenko agar aankh mein chubhe aansu