pyar ka haq ada kare koi
na kisi se dagha kare koi

bhai ko bhai se mohabbat ho
aur na bichhde khuda kare koi

apna hi nafa dekhte hain sab
sab ke haq mein dua kare koi

us ke gham ka ilaj kar dena
tum se jo iltija kare koi

apne gham mein hai mubtala duniya
aaj kis ka bhala kare koi

bhar gae zehn sab kasafat se
dil ko kya aaina kare koi

zakhm bharte nahin mere 'zakir'
to masiha hua kare koi