qadam jab ghar se bahar kanch ke paikar uthate hain
to phir hathon mein apne log bhi patthar uthate hain

hamari naw jo bach kar nikal aai hai tufan se
use gharqab karne ab kinare sar uthate hain

main ek majbur hun mazlum hun is shahr mein shayad
jabhi to log mujh par ungliyan aksar uthate hain

hamari zindagi ka hai yahi dar-asl sarmaya
ghamon ka bojh bhi hum roz-o-shab hans kar uthate hain

yaqinan rukh badal leti hain phir sarkash hawaen bhi
jo hum apne safine ka kabhi langar uthate hain

faqat kuchh nuqrai sikkon ki khatir aaj ahl-e-fan
qalam kis par uthana tha qalam kis par uthate hain

hazimat donon aalam mein faqat un ka muqaddar hai
jo bachche samne apne badon ke sar uthate hain

nikalte hain jo aansu dosto chashm-e-nadamat se
farishte aasman se aa ke ye gauhar uthate hain

jo taqlid-e-payambar ko shiar-e-zindagi kar len
maza jine ka aise log hi behtar uthate hain