qadam uthe to ajab dil-gudaz manzar tha
main aap-apne liye raste ka patthar tha

dil ek aur hazar aazmaishen gham ki
diya jala to tha lekin hawa ki zad par tha

har aaina meri aankhon se puchh leta hai
wo aks kya hue aabaad jin se ye ghar tha

har ek azab ko main sah gaya magar na mila
wo ek gham jo mere hausle se badh kar tha

ye wahm tha ki mujhe wo bhula chuka hoga
magar mila to wo meri hi tarah muztar tha

hazar bar khud apne makan pe dastak di
ek ehtimal mein jaise ki main hi andar tha

tamam umr ki tanhaiyan sameti hain
yahi mere dar-o-diwar ka muqaddar tha

udas raston mein paiham sulagti subhon mein
jo gham-gusar tha koi to dida-e-tar tha