qafas-nasibon ka uf haal-e-zar kya hoga
phir aa rahi hai chaman mein bahaar kya hoga

dil-o-jigar pe liye honge zakhm kitnon ne
koi hamari tarah dil-e-figar kya hoga

isi khayal se main arz-e-shauq kar na saka
haya se rang-e-rukh-e-tab-dar kya hoga

bahaar de na saki ek phul ko bhi nikhaar
khizan ke sath hai rang-e-bahaar kya hoga

fasurda lala-o-gul hain rawish rawish hai udas
chaman mein aise mein jashn-e-bahaar kya hoga

khadang-e-naz ne kuchh is tarah kiya zakhmi
jo dil ke zakhm hain un ka shumar kya hoga

kabhi ki tut gai aas raat bhig gai
kisi ke aane ka ab intizar kya hoga