qahr kaisa subh-dam baad-e-bahaari kar gai
phul barsana the dil par shoala-bari kar gai

tishna-e-takmil ek muddat se tha zauq-e-junun
kaam kuchh to doston ki sang-bari kar gai

jis qadar jhukte gae hote gae hum sar-buland
rifaton se aashna ye khaksari kar gai

hum gunahgaron ko rahmat ki kahan ummid thi
mustahiq lekin hamari sharmsari kar gai

har waraq diwan-e-dil ka naqsh-e-mani hai 'bahaar'
nok-e-mizhgan dekhiye kya husn-kari kar gai