qaid aur qaid bhi tanhai ki
sharm rah jae shakebai ki

sujhta kya hamein un aankhon se
shart thi qalb ki binai ki

dar-e-but-khana se badhne hi na pae
garche ek umr jabin-sai ki

qais ko naqa-e-laila na mila
go bahut baadiya-paimai ki

hum ne har zarre ko mahmil paya
hai ye qismat tere sahrai ki

waqf hai us ke liye jaan-e-aziz
kabe ke khadim o shaidai ki

kaba o quds mein ghar kiya ye bhi
ek ada hai mere harjai ki

nazar aaya hamein har chiz mein tu
us pe ye dhum hai yaktai ki

ishq aur jaur-e-sitamgar ka gila
had hai ai dil yahi ruswai ki

ishq ko hum ne kiya nazr-e-junun
umr bhar mein yahi danai ki

kar gai zinda-e-jawed hamein
tegh-e-qatil ne masihai ki

ho na taqlid dila maqtal mein
kahin musa se tamannai ki

na sahi tegh tajalli hi sahi
aankh jhapke na tamashai ki

kal ko hai phir wahi zindan 'jauhar'
thik kiya aap se saudai ki