qarib aa ki khazana hun lal-o-gauhar ka
hazar ret sahi ret hun samundar ka

khila hai phul bahut roz mein muqaddar ka
bas ab na band ho darwaza tere mandar ka

ye rahe-gahe ka milna bhi koi milna hai
jo ho sake to pata dijiye kabhi ghar ka

tamam-shahr hai hangama-e-nashat mein gum
magar ye karb ye sannata mere andar ka

sada kisi ki ho aata hai apne-ap se khauf
main wo gharib ki ghar ka raha na bahar ka

kabhi na khul ke hansa hun na roya ji-bhar ke
rakha hai main ne hamesha qadam barabar ka

kabhi kabhi ka ho qissa to koi dukh bhi sune
uthae bojh bhala kaun zindagi-bhar ka

gurez hai use meri gali se yun jaise
yahan jo aaya to ho jaega wo patthar ka

asir-e-dam fareb-e-zaban hua aakhir
na e'tibar jise aaya dida-e-tar ka

gham-e-zamana hai wo tegh-e-tishna-kaam 'anjum'
ude hain panw agar war bach gaya sar ka