qarib maut khadi hai zara thahar jao
qaza se aankh ladi hai zara thahar jao

na jao tum abhi taron ka dil dhadakta hai
tamam raat padi hai zara thahar jao

bujhe bujhe se sitare thaki thaki si nigah
badi udas ghadi hai zara thahar jao

nahin umid ki hum aaj ki sahar dekhen
ye raat hum pe kadi hai zara thahar jao

'hayat' ka dam-e-akhir nahin hai jaan-e-hayat
ye faisle ki ghadi hai zara thahar jao