shama-ru jalwa-kunan tha mujhe malum na tha
saf parde se ayan tha mujhe malum na tha

gul mein bulbul mein har ek shakh mein patte mein bhi
ja-ba-ja us ka nishan tha mujhe malum na tha

ye ghalat hasti-e-mauhum ko samjhe the magar
aur watan apna yahan tha mujhe malum na tha

ek muddat haram-o-dair mein dhunda nahaq
sim-bar dil mein nihan tha mujhe malum na tha

sach to ye hai ki siwa yar ke jo kuchh tha 'hayat'
wahm tha shak tha guman tha mujhe malum na tha