qasida fath ka dushman ki talwaron pe likkha hai
jo hum ne nara-e-takbir yalghaaron pe likkha hai

shanasai bhi tere shahr mein jab ajnabi thahri
to apna nam hum ne ghar ki diwaron pe likkha hai

shab-e-gham aasman ko takta rahta hun pahron yun
ki jaise gardish-e-qismat ka hal taron pe likkha hai

amal se dosto duniya hai jannat bhi jahannam bhi
nisab-e-zindagi insan ke kirdaron pe likkha hai

use puje hai 'muztar' ugta suraj jaan kar duniya
ki jis ne nam apna waqt ke dhaaron pe likkha hai