qatre qatre ko kabhi tarsa na tha
main ki dariya tha koi sahra na tha

hasraton ki jhil par kohra na tha
ham-safar suraj tha main tanha na tha

chehra chehra tha shanasa shahr mein
main kisi ki aankh ka tara na tha

pattharon ke shahr mein shisha badan
main hi tha jo tut kar bikhra na tha

basti basti be-hisi ki dhul thi
ab ke sawan tut ke barsa na tha

chandni ki dhup thi chaaron taraf
shahr-e-dil mein chand sa chehra na tha

us ka chehra hai ki 'nashtar' ki ghazal
aaine par tabsira likkha na tha