qissa-e-dard-e-jigar kis se kahun kaise kahun
ye mohabbat ka asar kis se kahun kaise kahun

raat bhar sham-e-nazar raushan kiye baitha raha
wo na aae ta-sahar kis se kahun kaise kahun

dil mera betab hai kis ki tajalli ke liye
kyon pareshan hai nazar kis se kahun kaise kahun

kaun hai aakhir wo kis ke naqsh-e-pa ke waste
muntazir hai rahguzar kis se kahun kaise kahun

puchhne ko aae hain ahbab mera haal-e-dil
kahna to chahun magar kis se kahun kaise kahun

kaise kaise dukh uthae main ne rah-e-shauq mein
dastan-e-pur-asar kis se kahun kaise kahun

bais-e-rahmat hai ya hai bais-e-zahmat 'mayank'
ek mohabbat ki nazar kis se kahun kaise kahun