ranj-o-gham dard-o-alam aah-o-fughan hai zindagi
saikdon unwan ki ek dastan hai zindagi

jal rahe hain khar-o-khas un ka dhuan hai zindagi
shakh-e-gul par ek sulagta aashiyan hai zindagi

dekhiye to ek habab-e-mauj-e-dariya bhi nahin
sochiye to ek bahr-e-bekaran hai zindagi

farsh-e-geti par farishton ne bhi himmat haar di
wo gham-e-dil-doz wo bar-e-garan hai zindagi

dard-o-kulfat se na ghabra ai 'mayank' is daur mein
sabr-o-istiqlal ka ek imtihan hai zindagi