qissa-e-mazi sipurd-e-taq-e-nisyan kar diya
zindagi mushkil thi is mushkil ko aasan kar diya

muntashir hai kis qadar shiraaza-e-nazm-e-hayat
apni barbaadi ka tu ne khud hi saman kar diya

ab shikayat hai tujhe be-mehri-e-taqdir ki
in nigahon ne hi virana gulistan kar diya

ab bhi baqi hain teri azmat ke kuchh zinda nishan
teri satwat ne to ek aalam ko larzan kar diya

muztarib hun azmat-e-rafta ko pane ke liye
jis ne aain-e-jahan-dari ko hairan kar diya

chahta hun main ho tajdid-e-mazaq-e-zindagi
main ne fitrat ke usulon ko numayan kar diya

rahbar-e-insaniyat meri nawa meri sada
aaj ek jins-e-giran-maya ko arzan kar diya