qusur ishq mein zahir hai sab hamara tha
teri nigah ne dil ko magar pukara tha

wo din bhi kya the ki har baat mein ishaara tha
dilon ka raaz nigahon se aashkara tha

hawa-e-shauq ne rang-e-haya nikhaara tha
chaman chaman lab-o-rukhsar ka nazara tha

fareb kha ke teri shokhiyon se kya puchhen
hayat o marg mein kis ki taraf ishaara tha

sujud-e-husn ki tamkin pe bar tha warna
jabin-e-shauq ko ye nang bhi gawara tha

chaman mein aag na lagti to aur kya hota
ki phul phul ke daman mein ek sharara tha

tabahiyon ka to dil ki gila nahin lekin
kisi gharib ka ye aakhiri sahaara tha

bahut latif the nazzare husn-e-barham ke
magar nigah uthane ka kis ko yara tha

ye kahiye zauq-e-junun kaam aa gaya 'taban'
nahin to rasm-o-rah-e-agahi ne mara tha