raat din chain hum ai rashk-e-qamar rakhte hain
sham awadh ki to banaras ki sahar rakhte hain

bhanp hi lenge ishaara sar-e-mahfil jo kiya
tadne wale qayamat ki nazar rakhte hain

dhundh leta main agar aur kisi ja hote
kya kahun aap dil-e-ghair mein ghar rakhte hain

ashk qabu mein nahin raaz chhupaun kyunkar
dushmani mujh se mere dida-e-tar rakhte hain

kaise be-rahm hain sayyaad ilahi tauba
mausam-e-gul mein mujhe kat ke par rakhte hain

kaun hain hum se siwa naz uthane wale
samne aaen jo dil aur jigar rakhte hain

dil to kya chiz hai patthar ho to pani ho jae
mere nale abhi itna to asar rakhte hain

chaar din ke liye duniya mein ladai kaisi
wo bhi kya log hain aapas mein sharar rakhte hain

haal-e-dil yar ko mahfil mein sunaun kyun kar
muddai kan udhar aur idhar rakhte hain

jalwa-e-yar kisi ko nazar aata kab hai
dekhte hain wahi us ko jo nazar rakhte hain

aashiqon par hai dikhane ko itab ai 'jauhar'
dil mein mahbub inayat ki nazar rakhte hain