raat hai kali ghata hai aur main
pur-khatar ye rasta hai aur main

par utarne ki koi surat nahin
kashti-e-be-na-khuda hai aur main

kis dagar par aa daboche kya pata
pichhe pichhe hadisa hai aur main

aandhiyon ka zor kam hota nahin
phus ka ye jhonpada hai aur mein

apne andar ki dahakti aag se
har koi shoala-nawa hai aur main

aafiyat ki karte rahiyega dua
jal sazish ka bichha hai aur main

gardish-e-ayyam ka 'anjum' suno
silsila-dar-silsila hai aur main