raat phir jaanib-e-sahar aai
kitni dushwar rahguzar aai

chand taron ke phul murjhae
jab bhi shabnam ki aankh bhar aai

hasraton ka safed-fam kafan
kaun pahne hue kidhar aai

kis tamanna ki chashm-e-awara
thokaren kha ke dar-ba-dar aai

aaj rang-e-shafaq ajib sa tha
dil ki taswir si utar aai

ek zamana hua khizan guzre
dil ujadne ki ab khabar aai

kya hua dil ki aabru na rahi
zindagi kuchh to rah par aai