raaz-e-ulfat ayan na ho jae
sai-e-gham raegan na ho jae

na-umidi hai ab to wajh-e-sukun
phir koi mehrban na ho jae

nigah-e-lutf se na dekh hamein
phir tamanna jawan na ho jae

hum hain nazan wafa pe wo shaki
yun koi bad-guman na ho jae

hum to marte hain ai wafa walo
khatm ye dastan na ho jae

khaksaron ko to haqir na jaan
ye zamin aasman na ho jae

ai nasheman ko kosne walo
barq khud aashiyan na ho jae

tere ashaar ki zamin 'sahar'
ghairat-e-asman na ho jae