raaz ye sab par ayan hona hi tha so ho gaya
mujh ko ek din raegan hona hi tha so ho gaya

dil ko mere teri hasrat ke adhure bab ki
ek mukammal dastan hona hi tha so ho gaya

mitte mitte waqt ke hathon mujhe bhi aakhirash
be-nishani ka nishan hona hi tha so ho gaya

maslahat par munhasir tha so hamare rabt ko
ek din to raegan hona hi tha so ho gaya

farq rang-o-nasl ka tha mujh mein tujh mein is liye
hail us ko darmiyan hona hi tha so ho gaya