rabte tut gae ranj se hum tut gae
jab tere pyar ke wo qaul-o-qasam tut gae

ban gai dard khushi jaan pe sitam tut gae
jin ki ummid na thi dil pe wo gham tut gae

jab mohabbat mein utha daulat-oghurbat ka sawal
lamha-e-shauq pe sadiyon ke alam tut gae

barq ban kar hi gira aisa karam tha tera
hum ki jhukte bhi na the teri qasam tut gae

todne wale mere dil ko tujhe kya malum
dil nahin tuta mera dair-o-haram tut gae

bandagi kaisi meri kaisi wafa kaisa sila
main ne barson jo tarashe wo sanam tut gae

kaun samjhega bhala kis ko bataun 'sima'
meri masum si hasti pe jo gham tut gae