rah-e-hayat mein bas wo qadam badha ke chale
diye lahu ke sar-e-rah jo jala ke chale

gulon ko pyar kya aur gale laga ke chale
chaman mein kharon se daman na hum bacha ke chale

pata chala na masafat ka pa gae manzil
qadam se jab bhi qadam dosto mila ke chale

nahin hain waqif-e-asrar-e-lazzat-e-manzil
jo rah-e-shauq se kante hata hata ke chale

hazar khar hain daman ko thamne wale
hamare hath se aanchal jo tum chhuda ke chale

wo guzren shauq se be-khauf o be-khatar 'saghar'
dikha ke rasta manzil ko hum bata ke chale