rah-rawi hai na rahnumai hai
aaj daur-e-shikasta-pai hai

aql le aai zindagi ko kahan
ishq-e-nadan teri duhai hai

hai ufuq dar ufuq rah-e-hasti
har rasai mein na-rasai hai

shikwe karta hai kya dil-e-nakaam
aashiqi kis ko ras aai hai

ho gai gum kahan sahar apni
raat ja kar bhi raat aai hai

jis mein ehsas ho asiri ka
wo rihai koi rihai hai

karwan hai khud apni gard mein gum
panw ki khak sar pe aai hai

ban gai hai wo iltija aansu
jo nazar mein sama na pai hai

barq nahaq chaman mein hai badnam
aag phulon ne khud lagai hai

wo bhi chup hain khamosh hun main bhi
ek nazuk si baat aai hai

aur karte hi kya mohabbat mein
jo padi dil pe wo uthai hai

nae safi mein ho na aalaish
yahi 'mulla' ki parsai hai