rahat-e-jaan tha wahi ab dushman-e-jaan ho gaya
zarf-e-marham apni qismat se namak-dan ho gaya

zindagi par bas nahin hai maut par qabu nahin
bas inhin majburiyon ka nam insan ho gaya

khun ki chhinton se wahshi ne khilae itne gul
ek chaman chhota sa bar-diwar zindan ho gaya

khun ka dawa to kaisa aur ulta hashr mein
kat gaya main jab mera qatil pasheman ho gaya

hatiye hatiye naghma-e-hasti se lau uthne lagi
bachiye bachiye mere jal bujhne ka saman ho gaya

zabt ki duniya dubo di ek aansu ne mere
bund-bar pani badha itna ki tufan ho gaya

ashk-e-khuni ne mere 'nashtar' wo kin gulkariyan
mera daman ek chhota sa gulistan ho gaya