rahegi shor-e-nawai hayat mein kab tak
ana ki zo'm-gari baat baat mein kab tak

nikal ke dekh hisar-e-had-e-tayyun se
yunhi rahega asir apni zat mein kab tak

haqiqatan jo na kuchh bhi sunen sunaenge
udaenge wo hamein baat baat mein kab tak

yaqin na aaega kab tak unhen mohabbat ka
rahega rabta na-mumkinat mein kab tak

dikhae jaenge manzar hamein qayamat ke
khayal-o-khwab yunhi raat raat mein kab tak

kahan hai kis ke liye hai khushi bara-e-khushi
gham-e-hayat rahega hayat mein kab tak

sukun-e-qalb ka pahlu 'rishi' bahar-pahlu
nazar na aaega taskhir-e-zat mein kab tak