rahi koi nahin hai koi rahnuma nahin
jis rah par chala hun kahin naqsh-e-pa nahin

sajde mere zaman-o-makan se hain be-niyaz
kaba se but-kade se koi rabta nahin

dil hai kahin khayal kahin hai nazar kahin
ai shaikh tera ek bhi sajda rawa nahin

be-kaif si hai raat to be-lutf sa hai din
sach to ye hai ki jine mein kuchh bhi maza nahin

sham-o-sahar bahaar-o-khizan ranj-o-imbisat
koi bhi inqalab ki zad se bacha nahin

tanqid kar rahe hain wo ashaar par 'zamir'
sher-o-sukhan se jin ko koi wasta nahin