rahm kar zalim mera haal-e-pareshan dekh kar
kaun hansta hai kisi ko gham mein giryan dekh kar

dastan aao main dardon ki sunaun aap ko
baad mere kya karoge mera diwan dekh kar

dekhiye aae na aae naz huron ka pasand
main chala hun ghaur se andaz-e-khuban dekh kar

aap ko karte hue barbaad kyon aaya na rahm
aafaten roti hain mere ghar ko viran dekh kar

adl ko 'nayab' rakh har kaam mein madd-e-nazar
haq ne do aankhen tujhe bakhshi hain mizan dekh kar