rahte nahin qabu mein sar-e-rahguzar panw
rakhte hain idhar panw to padte hain udhar panw

kandhon pe liye umr ka bosida janaza
jata hai udhar jism bhi jate hain jidhar panw

mahaul hi aaina-e-har-ahd-e-nawi hai
jhule hi mein aa jate hain bachche ke nazar panw

badh jate hain kuchh aur bhi manzil ke taqaze
kho dete hain jab hausla-e-azm-e-safar panw

pamal hue hain kai sahraon ke sine
yunhi nahin aate hain nazar khak-basar panw

har chand badhi jati hai lamhon ki masafat
thakte nahin badhte hue sadiyon ke magar panw

milti nahin gar zehn ko idrak ki aankhen
rakhte hi nahin farsh pe mahrum-e-basar panw

shahron ki tijori kabhi deti nahin roti
kheton mein pahunchte nahin dahqan ke agar panw

sidhi sahi lekin rah-e-ikhlas pe 'ahmar'
padte hain zamane ke ba-andaz-e-digar panw