rang khushbu na sada hun tere kis kaam ka hun
tu hi khud soch main kya hun tere kis kaam ka hun

ham-nafas qarya-e-pur-nur ke rahne wale
ek maddham sa diya hun tere kis kaam ka hun

main zarurat tha magar teri tamanna to nahin
kyun tera sath nibhaun tere kis kaam ka hun

teri marzi mera masraf to nikale jo bhi
main to ye jaanna chahun tere kis kaam ka hun

tera maslak hi ye hangama-e-hasti hai magar
main ki mahrum-e-nawa hun tere kis kaam ka hai

tu jo us par khada hai to mujhe kya 'tariq'
main jo is par khada hun tere kis kaam ka hun