rang to maujud ki taswir ho sakte nahin
wo jo manzar khwab hain tabir ho sakte nahin

kyun mujhe ashaar kahne ka hunar us ne diya
mujh se mere dukh agar tahrir ho sakte nahin

aankh mein manzar to aa sakte hain surat odh kar
aaine to aks se zanjir ho sakte nahin

main hi apne dard-o-gham likkhunga apne hath se
ye janaze aap se tahrir ho sakte nahin

sarf ho jaenge hum us ki mohabbat mein yunhi
sarf ho jaenge hum taskhir ho sakte nahin

is zamin ki toh mein rahna himaqat hai miyan
jis zamin pe sher bhi tamir ho sakte nahin

guftugu ye kah rahi hai baat mein halke ho tum
so muridi mein raho tum pir ho sakte nahin

nind to be-kar mein in kosnon ki zad mein hai
khwab hi aise hain jo tabir ho sakte nahin

is ko sehl-e-mumtana mein baat aaegi samajh
'zeb' aise sher to tafsir ho sakte nahin