ranj-o-alam ke bab ka unwan ishq hai
isar ke nisab ka unwan ishq hai

aghyar ka khayal jo dil se nikal de
hurmat ke us sarab ka unwan ishq hai

mahsus aaftab ki jis se na ho tapish
gesu ke us sahab ka unwan ishq hai

har dam tayyar hai jo karae ko sar qalam
aise jari shabab ka unwan ishq hai

anjam garche tur hai khwahish ke bab ka
didar be-hijab ka unwan ishq hai

pahle guzar ho aag se pani se khak se
phir jawedan khitab ka unwan ishq hai

zulmat se nikal ke 'sahba' jo nur de
raushan usi kitab ka unwan ishq hai