rasta bhi hami log the rahi bhi hamin the
aur apni masafat ki gawahi bhi hamin the

jo jang chhidi thi use jite bhi hamin log
ran chhod ke bhage wo sipahi bhi hamin the

wo shahr basa bhi tha hamari hi badaulat
is shahr-e-tamanna ki tabahi bhi hamin the

raushan bhi hami se rahi taqdir hamari
aur apne muqaddar ki siyahi bhi hamin the

hai dam jo dariya mein wo phenka tha hamin ne
us dam mein phansti hui mahi bhi hamin the