ratjagon ki saltanat taskhir kar
kuchh diye ka nam bhi tahrir kar

hai hisar-e-zat ke bahar shikast
tu mere andar mujhe tamir kar

furqaton ka zahr mujh ko pach gaya
gardish-e-dauran meri tauqir kar

ya badan ki qaid se aazad kar
ya kisi gham se mujhe zanjir kar

khwab aankhon mein agar rakkhe hain tu
phir hatheli par bhi kuchh tahrir kar

kuchh diye ke dukh suna mujh ko 'amir'
kuchh hawa ke nam bhi tahrir kar