rida-e-rahat-e-kaun-o-makan odh ke dekh
zamin odh ke dekh aasman odh ke dekh

tilism tut chuka jab charagh-e-zulmat ka
kabhi sabahat-e-nam-o-nishan odh ke dekh

pada rahega kahan tak tu apne tarkash mein
khadang-e-jasta agar hai kaman odh ke dekh

qarib aa hi gaya hai agar wo abr-e-karam
safar mein aaj yahi saeban odh ke dekh

hawa-e-shahr haqiqat mein sans lete hue
nigar-khana-e-wahm-o-guman odh ke dekh

phir ek bar kisi jang par nikalte hue
faza-e-qarya-e-amn-o-aman odh ke dekh

naya libas pahanne ka waqt hai 'sajid'
shikoh odh ke dekh aan-ban odh ke dekh