ruh gar nauha-kunan ho to ghazal hoti hai
dil ko ehsas-e-ziyan ho to ghazal hoti hai

mahfil-e-mah-washan mein to ghazal ho na saki
bazm-e-ashufta-saran ho to ghazal hoti hai

sirf aankhon mein nami se na banegi koi baat
ek dariya sa rawan ho to ghazal hoti hai

main ne mahsus kiya hai ki kisi ki wo nazar
meri jaanib nigaran ho to ghazal hoti hai

dhime dhime se sulagte hue jazbaat ke sath
'mir' ka tarz-e-bayan ho to ghazal hoti hai