ruka to raaz khula kab se apne ghar mein tha
ki mera ghar to meri haalat-e-safar mein tha

bahut ajib sa dukh tha jo tu ne mujh ko diya
ki ek tabassum-e-makhfi bhi chashm-e-tar mein tha

iraq o sham ke parde mein be-naqab hua
tamam dahr ka dukh ek nange sar mein tha

qadam urus-e-wafa ke kahan kahan pahunche
hina ka rang sitaron ki rahguzar mein tha

bas ek jurat-e-rindana arsa-e-shab mein
palak jhapakte hi main arsa-e-sahar mein tha

hazar rang the us ke hazar pahlu the
juda juda wo jhalakta nazar nazar mein tha

ba-faiz-e-bar-e-malamat jhuki kamar meri
hara shajar tha magar shahr-e-be-samar mein tha