ruki hui hai abhi tak bahaar aankhon mein
shab-e-visal ka jaise khumar aankhon mein

mita sakegi use gard-e-mah-o-sal kahan
khinchi hui hai jo taswir-e-yar aankhon mein

bas ek shab ki masafat thi aur ab tak hai
mah o nujum ka sara ghubar aankhon mein

hazar sahib-e-rakhsh-e-saba-mizaj aae
basa hua hai wahi shah-sawar aankhon mein

wo ek tha pa kiya us ko jab tah-e-talwar
to bat gaya wahi chehra hazar aankhon mein