tumhaara aks agar mujh se dur niklega
to meri aankh se dariya zarur niklega

bas is liye hi to wo raaz main ne raaz rakha
mujhe khabar hai ki tera qusur niklega

chala ke sine pe khanjar ye dekh lo tum khud
dukhon se qalb mera chur-chur niklega

koi to aaega hamdard sun ke meri sada
koi to apne makan se zarur niklega

shajar laga ke 'malik' nim ka wo kahte hain
laga lo shart ki is par khajur niklega