sab jit kar bhi mat se aage nahin gaya
wo shakhs meri zat se aage nahin gaya

na-mumkinat se hi tha aaghaz-e-zindagi
buzdil to mumkinat se aage nahin gaya

thahra hai waqt aaj bhi bichhde the hum jahan
ek pal bhi gham ki raat se aage nahin gaya

umron ka intizar wo jholi mein dal kar
do-chaar pal ke sath se aage nahin gaya

gham hijr ka hai ya use shauq-e-visal hai
insan gham-e-hayat se aage nahin gaya

jitne lage hain zakhm mere doston ke hain
dushman to sirf ghat se aage nahin gaya

mitti ke hath ishq ki mitti palid hai
tu bhi hawas ki baat se aage nahin gaya

hathon mein hath dal ke jaana tha chand par
afsos chand-raat se aage nahin gaya

main dur se hi dekh ke khush ho gai use
aur wo bhi khwahishat se aage nahin gaya