sab ka chehra pas-e-diwar-e-ana rahta hai
aaine se yahan har shakhs khafa rahta hai

phir bhi hum log wahan jite hain jine ki tarah
mausam-e-qahr jahan thahra hua rahta hai

us ke aane ki ab ummid nahin hai raushan
phir bhi darwaza-e-dil hai ki khula rahta hai

rang-e-tabir chamakta hi nahin aankhon mein
raat bhar khwab ka bazar saja rahta hai

bas usi aks se khaif hai har ek shakhs yahan
aaina-khane mein jo chehra-numa rahta hai

khana-e-dil pe hukumat hai usi ki 'akhtar'
ye alag baat ki wo mujh se khafa rahta hai