sans ukhdi hui sukhe hue lab kuchh bhi nahin
pyas ka nam hi raushan hai bas ab kuchh bhi nahin

subh tak phir bhi nahin bujhte hain aankhon ke charagh
jaanta hun ki pas-e-parda-e-shab kuchh bhi nahin

sar-e-ehsas pe dastar-e-fazilat na rahi
bas ki ab silsila-e-nam-o-nasab kuchh bhi nahin

gul-e-imkan na sarsabz koi barg-e-umid
yani ab ke to sar-e-shakh-e-talab kuchh bhi nahin

be-talluq rahe barson to koi baat bhi thi
in dinon tum se na milne ka sabab kuchh bhi nahin

waza-dari hi bikharne nahin deti 'akhtar'
warna hum tute hue logon mein ab kuchh bhi nahin