sab ki zaban pe zikr teri tund-khu ka tha
mere labon pe qufl teri aabru ka tha

main gu-magu mein hi tere dar se palat gaya
aawaz doston ki thi lahja adu ka tha

chaaragaron ko fikr thi nam-o-numud ki
go ehtimam zakhm-e-jigar ke rafu ka tha

main bahr-e-zindagi mein jazira-numa raha
duniya se ek rabt teri aarzu ka tha

har khub-ru se main ne kiya wada-e-wafa
sab aainon mein aks mere khub-ru ka tha

mahir hun main bhi khubi-e-guftar ka magar
darpesh marhala sukhan-e-ru-ba-ru ka tha

jo harf mein na saut mein izhaar pa saki
sab doston mein zikr usi guftugu ka tha