sab kuchh na kahin sog manane mein chala jae
ji mein hai kisi aur zamane mein chala jae

main jis ke tilismat se bahar nikal aaya
ek roz usi aaina-khane mein chala jae

jo mere liye aaj sadaqat ki tarah hai
wo khwab na gum ho ke fasane mein chala jae

sahma hua aansu ki sisakta hai palak par
ab tut ke daman ke khazane mein chala jae

ek umr ke baad aaya hai jine ka saliqa
dukh hoga agar jaan bachane mein chala jae