sham-e-gham kuchh us nigah-e-naz ki baaten karo
be-khudi badhti chali hai raaz ki baaten karo

ye sukut-e-naz ye dil ki ragon ka tutna
khamushi mein kuchh shikast-e-saz ki baaten karo

nikhat-e-zulf-e-pareshan dastan-e-sham-e-gham
subh hone tak isi andaz ki baaten karo

har rag-e-dil wajd mein aati rahe dukhti rahe
yunhi us ke ja-o-beja naz ki baaten karo

jau adam ki jaan hai jo hai payam-e-zindagi
us sukut-e-raaz us aawaz ki baaten karo

ishq ruswa ho chala be-kaif sa bezar sa
aaj us ki nargas-e-ghammaz ki baaten karo

nam bhi lena hai jis ka ek jahan-e-rang-o-bu
dosto us nau-bahaar-e-naz ki baaten karo

kis liye uzr-e-taghaful kis liye ilzam-e-ishq
aaj charkh-e-tafraqa-parwaz ki baaten karo

kuchh qafas ki tiliyon se chhan raha hai nur sa
kuchh faza kuchh hasrat-e-parwaz ki baaten karo

jo hayat-e-jawidan hai jo hai marg-e-na-gahan
aaj kuchh us naz us andaz ki baaten karo

ishq-e-be-parwa bhi ab kuchh na-shakeba ho chala
shokhi-e-husn-e-karishma-saz ki baaten karo

jis ki furqat ne palat di ishq ki kaya 'firaq'
aaj us isa-nafas dam-saz ki baaten karo