sab lahu jam gaya ubaal ke bich
kaun yaad aa gaya visal ke bich

ek waqfa hai zindagi-bhar ka
zakhm ke aur indimal ke bich

aan baitha hai ek andesha
guftugu aur arz-e-haal ke bich

tal deti hai jab kabhi wahshat
raqs karta hun main khayal ke bich

kabhi matam miyan-e-raqs kiya
kabhi sajda kiya dhamal ke bich

ek parda hai be-sabaati ka
aaine aur tere jamal ke bich

ek baras ho gaya use dekhe
ek sadi aa gai hai sal ke bich

mere daman ko dhone wala hai
ek aansu jo hai rumal ke bech