sab un ka haal dekh rahe hain nazar se hum
baithe hain is tarah se ki hain be-khabar se hum

himmat se kaam le ke nigahen mila to len
uljhan mein pad gae hain payam-e-nazar se hum

udne laga hai phailta jata hai har taraf
is daman-e-khayal ko pakden kidhar se hum

dikhla diya jo aaj muqaddar ne us ka dar
ek bojh tha utar chale apne sar se hum

dil mein utar na aaen wo aankhon ki rah se
dil ko bacha rahe hain khud apni nazar se hum

rahen bhi band hain dar-e-taqdir bhi hai band
us ke harim-e-naz mein jaen kidhar se hum

hain aur kya irade tumhein is ki fikr kyon
'ejaz' puchh lenge usi fitna-gar se hum